Bani sada Huta i tanoh Simalungun, adong ma sada garamama namargoran Rappunei. Basar janah riggas do ia marhorja. Selain martugas i kantor camat, marwiraswasta do homa garama on. Bolak do jumani janah buei do pinahan ni. Aima ase igoran do ia “Garama Tokeh” i huta ni. Sogod ope ari, kira-kira jam 4 sogod doma puho ia. Dob puho, lopus ma ia hu dapur, igorgori ma bah bahen inumon. Dob gurgur bah ai, tor iagu ma kopi bahen inumon ni.
Das ma panorang ni, jam 04.30 sogod misir ma ia hu sampalan mangosor horbou irik ihadang ma homa tunggom pakon jagul bahen paguton ni dayok i juma. Halani siluk salosei mangosor horbou marragat ma ia janah mabere mangan dayok. Dob salpu maragat, iboan ma bah ni nira ai hu sopou pargulaan. Halani tiap sore adong do anggota ni dua halak namargula.
            Lang niahapkon jupah ma panorang jam 05.30. maridi ma ia i juma ai, halani dong do memang ianan bah paridian dohor hun juma ni ai. Das ma panorang jam 06.00 mulak ma ia hu rumah irik sarapan, halani doma memang ipasirsir inang ni sarapan untuk keluarga i rumah ai. Jam 06.30 marsaran ma ia tokin irik pasirsirhon ugas-ugas ni laho misir hu kantor. Sonai ma tong hasomalan ni ari-ari.
Jam 07.15 doma das ia i kantor. Jadi dong ope panorang ni mambasa-basa koran. Boi goranon memang garama on ma na tong parlobei das i kantor ase bos ni (Ibu Camat). Aima ase salut tumang do Ibu camat on mangidah garama on. “Hansi pe au tamatan STPDN, na memang ilatih untuk disiplin tinggi, lang ope tar usih au songon botou on”, sonai ma tong ibagas uhur ni. Memang anak boru ope Ibu Camat on, goran ni Hatirongga, umur ni kira-kira 29 Tahun. Ia si garama on 28 tahun.
Hape ni sadokah on, na memendam rasa do Ibu Camat on bani Garama on. Hansi lang pak ai padashon bani Rampunei. Ai ijolom Hatirongga on ope istilah “Sigei do manandangi bagod” (tangga adalah jalan memanjat/ menuju enau), sigei identik pakon garama, janah bagod identik do bani anak boru (sabou).
            Jadi sadokah on, tarpaima-ima do namin si Hatirongga bani parroh ni si Rampunei martandang. Secara logika mahol tumang do ai tarjadi, mardingat si Hatirongga aima atasan ni si Rampunei. Jadi dong unsur malang (segan) ijon. Itambah homa use, si Rampunei on pe marhorja do hansa lalap ibagas uhur ni, lang mardingat ia bani umur ni na doma hampir kopala 3. Memang, ia pe namin anggo laho modom bani borngin in, ra do marangan-angani ia pasal hasoman parangguan ni haduan. Tapi, dasar lang somal ope marhasoman-marhasoman-marhasoman (pacaran) ia, jadi mahol tumang. Tarlobih dong homa do ibagas ipikiran ni, “pamaos-maos sipatu do hansa in, holi anggo doma tappei diri marodor do roh anak boru in ”, sonai ibagas uhur ni. Dasar memang si Rampunei on, kurang pengalaman dalam percintaan.
            Jadi anggo panorang malam minggu memang ra do ia mardalani hu rumah ni sanina (abang) ni. Sanina ni on doma marhajabuan. Jadi, bani sada panorang marsukun ma na si kaha ni dompak si, “ai mase hujon do hansa ho tiap malam minggu, lang martondur anggi? Boi ma homa ipikir-pikiri da”. “sonon ma da kaha, lang hubotoh sonaha mamukah, sihol do namin uhur”. Iulaki kaha ni use marsukkun, “ai ongga do gatni iparbualhon ho atasan mu na i kantor ai?”. “Ai mase sonai nimu kaha, tontu bos diri i kantor aira lang ongga niparbualhon?, ham pe homa”. Sopong roh abang ni mamotong parsahapan, “maksud ni kaha mai ge ambia, i luar ni urusan kantor do da. Ai ikan na i tao toba ai pe lang ra roh sandiri bani piring anggolang palobei ikail da ambia. Huidah-idah ambia, bujur do ai, ramah, janah rupani pe ranum do homa”. Mambogei hata ranum, tarsirom na si kaha ni. Taringgat ia bani hata-hata gombal ni pargotong ni (abang ni Rampunei) hinan sanggah poso ope.
“Sonon do ai bang, kaha, au pe memang dong do uhur hu bani Ibu Hatirongga ai. Huidah pe memang songon na legan do tong paniseini dompak au, lang songon dompak hasoman na legan (he he sambil tarsirom Rampunei). Tapi sonaha ma mungkin, bos ku do ia, malang tumang do au da kaha, bang” nini Rampunei.
            “Yah, martiru cerita mai janah nahuidah gampang mando anggo doma sonai cerita ni ambia. Eheh, on kan barah ma ahir bulan. Tontu dong ma laporan na laho susunonmu janah maningon isetujui Camat. Nah, ai ma dalan ambia”, nini abang ni. Bingung ma si Rampunei, “dalan sonaha do maksudmu bang, gari dalan i Simalungun on pe buei ope manrawang. Ai tiap bulan do au patekenhon laporan bani Ibu ai”, nini Rampunei. “ai ma tong ho ge ambia, massari do hansa iuhuri ho. Anggo doma dong holi hasomanmu saparangguan, lobih hunjai pe use boi ambia, halani dong ma hasomanmu marpikir, manriah. Jadi sonon ma ai ambia, sanggah manoruhkon laporan ai ho, salpu ai marbuali ma hanima. Tapi ulang urusan kantor be ibuali, sukkup ma lobe i kantor isahapi masalah horja. Sukun ma atap aha tor-tor harosuhni, ija hinan ia sikolah, pnl pnl. Inti ni i luar ni urusan kantor ma, atap isukun ho pe nomor piga sipatu ni urusanmu ma ai, napenting i luar urusan kantor ma ge, baenma sonaha ase tarsirom ia, ulang homa pusok uhur ni ibaen ho. Inti ni ambia, anggo doma nyaman ia rap pakon ho, asi nari ma ai. Tapi sonon otik ambia, untuk seterus ni ase songon na film-film ai, boi hanima sms-an atau telefonan lang canggung-canggung be ho, sonon ba . . .en:”. Lape salpu sahap ni abang ni, mintor ipotong si Rampunei, “naha ma ai bang?”. “Ya ah, sabar otik ho lo ambia. Jadi holi sanggah martandang ai ho boan-boan kunci lamarimu, jadi laho mulak holi ho hanjai tading ma baen kunci ai. Jadi dob das holi ho i rumah, itelepon ni ma ho patugahkon bahasani natading kunci mai. Tontu, salpu ai urusanmu ma ge ambia, baen ma tong caramu sonaha ase tar ganjang parbualan i udara ai ge janah nyaman ia baen”.
            Ha ha ha, tartawa si Rampunei. “ya ah, ham tongon bang, hebat do ham mangatur skenario ai”. “anggo doma harosuh ge ambia hu ujung dunia pe niayakan do da. Anggo lang sonai hinan ija dapot kaha mai”. “berarti bahat do hinan hasomanmu anak boru bang?” sukun-sukun ni Rampunei. “ya, bahat ma ge ambia. Tapi aima, kahamon do ganup nomor sada ni”, tarsirom use kaha ni ai.
Jupah ma tongon akhir bulan, ibaen ma songon na ipodahkon abang ni ai. Tading ma tongon kunci lamari ai i jabu ni Rampunei. Rap . . ., ijin das i Jabu si Rampunei marhata ma handphone ni. Nada dering ni pe : boru manik makkawah ham otik, ase huidah rupamu na santik. Memang boru damanik ge si Hatirongga on. Sonaima ganjang parbualan, dob ni lambin dohor ma si Rampunei pakon si Hatirongga. Gati ma homa sidea mardalani padua-dua hu Tinggi Raja, Pantai Paris Tiga Ras, Rumah Bolon, Simarjarunjung, pnl.
            Nah, bani sada panorang martandang ma use si Rampunei hu jabu ni orangtua ni Hatirongga irik patandahon diri ma on. Marbual-buali tontu pakon orangtua ni Hatirongga. Sosok homa ma pangahap ni orangtua ni si Hatirongga, si Rampunei on ma na gabe hela ni.
Das jam 11 borngin, parmisi ma ia mulak. Tanpa isengaja tading homa hape flasdisk ni i rumah ni Hatirongga. Padahal adong data naporlu iprint ijai. Itelepon ni ma Hatirongga, “de, tading hape flasdisku i rumah kan? Hape dong data na maningon iprint untuk patar de”. “Aima da bang, sahali nari pinggolmu pe tadingkon ham ma ijon bang”, marhuria-huria si Hatirongga. “Aha goran ni file ni bang? Au pe mamprinthon”, nini Hatirongga. Buka ham ma folder “HATIRONGGA HAHOLONGANHU”, ijai holi dong file judul ni “tata ruang simalungun menyikapi kawasan ekonomi khusus sei mangkei”.
Doma ibotoh hita pasti sonaha pangahap ni Hatirongga manangar goran ni folder ai “HATIRONGGA HAHOLONGANHU”. Jupah malam minggu berikut ni, martandang ma use si Rampunei. Taringat ma use si Hatirongga pasal flasdisk na tading ai. “Hinan kunci doma ongga tading, minggu na salpu flasdisk, holi pinggolmu pe tadingkon ham ma ijon bang”, nini Hatirongga irik tarsirom. Roh balos ni Rampunei, “aima da de, lang pitah pinggolhu, uhurhu pe hutadingkon ma ijon”.
Ujung ni saud ma si Rampunei pargotongni Hatirongga, Janah Hatirongga ma parbulang ni Rampunei.